შეხვედრა კავკასიის უნივერსიტეტში
6 დეკემბერს, შოთა რუსთაველის საქართველოს ეროვნული სამეცნიერო ფონდის გენერალური დირექტორი ზვიად გაბისონია კავკასიის უნივერსიტეტის აკადემიურ პერსონალს, პროფესორ-მასწავლებლებს და სტუდენტებს შეხვდა. პრეზენტაცია კავკასიის უნივერსიტეტის პრეზიდენტმა კახა შენგელიამ გახსნა. ფონდის გენერალურმა დირექტორმა ზვიად გაბისონიამ წარადგინა პრეზენტაცია „საქართველოს მეცნიერების ევროპულ სივრცეში ინტეგრირების ახალი ეტაპი - ახალი შესაძლებლობები მეცნიერებისთვის”, ისაუბრა საქართველოს ევროკავშირის მეცნიერებისა და ინოვაციების სახელმწიფოთაშორისი ორგანიზაციის- EURAXESS-ის წევრობის მნიშვნელობაზე- ფართო შესაძლებლობებსა და ახალ სერვისებზე საქართველოს მეცნიერებისთვის. ფონდის გენერალურმა დირექტორმა ხაზგასმით აღნიშნა, რომ საქართველოს ისტორიის გაყალბების მცდელობების წინააღმდეგ მიმართული სამეცნიერო პროექტების მხარდაჭერა და მათი საერთაშორისო საზოგადოებისთვის გაცნობა რუსთაველის ფონდის პრიორიტეტია, აუდიტორიას გააცნო ისტორიაში პირველად, ფონდის მიერ გამოცხადებული ახალი მიზნობრივი კონკურსები: ოკუპირებული ტერიტორიების შემსწავლელი სამეცნიერო პროექტების და საერთაშორისო სამეცნიერო ღონისძიებების კონკურსი, საქართველოს საზღვრისპირა რეგიონების შემსწავლელი სამეცნიერო კვლევებისა და საგამომცემლო გრანტების კონკურსები, ასევე, კავკასიოლოგიური მიმართულების სამეცნიერო პროექტების კონკურსი, რომელიც უახლოეს პერიოდში გამოცხადდება. ისაუბრა ამ პროექტების დიდ სახელმწიფოებრივ, ეროვნულ მნიშვნელობაზე. შეხვედრის დასასრულს, კავკასიის უნივერსიტეტის პრეზიდენტმა კახა შენგელიამ მადლობა გადაუხადა სტუმრობისთვის ფონდის გენერალურ დირექტორს და წარმატებები უსურვა მომავალ აქტიურ საქმიანობაში. ბოლოს ზვიად გაბისონიამ უპასუხა ახალგაზრდა მეცნიერების, დამსწრე აუდიტორიის შეკითხვებს.
